Hər
gün yüzlərlə insan sürücülük vəsiqəsi alır və öz avtomobilinin sükanı
arxasına keçəcəyi və yol hərəkətinin tam hüquqlu iştirakçısına
çevriləcəyi anı həyəcanla gözləyir. Amma avtomobil məktəbindəki təlim
gələcək sürücülər üçün zəruri olan biliklərin yalnız kiçik bir
hissəsini verir.
Avtomobil
həvəskarının əsl avtomobil sürücüsü olması və sükan arxasında özünü
inamlı hiss etməsi üçün o, bilavasitə yolda hərəkət zamanı çox şeylər
öyrənməlidir. Bu məqalədə biz avtomobil sürməyə yeni başlayan
sürücülərin işini bir qədər asanlaşdırmaq üçün onlara avtomobilin idarə
olunması ilə bağlı bir neçə məsləhət verəcəyik.
Bəzi
yeni sürücülər üçün avtomobil qarşısında psixoloji qorxunu dəf etmək
çətindir, hətta onlar sürücülük vəsiqəsi alsalar belə, avtomobili idarə
etməyə qorxurlar. Bu qorxudan yaxa qurtarmağın bircə yolu var:
avtomobili idarə etməyə başlamaq.
Avtomobili
sürməkdən nə qədər qorxsanız da, onu yalnız zəruri hallarda deyil,
kifayət qədər tez-tez sürməyə çalışın. Çünki avtomobili nadir hallarda
sürsəniz, bu sizin ustalığınızı artırmayacaq, əksinə, psixoloji
qorxunuz daha da artacaq.
Ən
əsası, yolda həyəcanlanmaq və təlaşa düşmək olmaz. Siz sakit və özünüzə
inamlı olmalısınız. Yol hərəkətinin bütün iştirakçılarına qarşı
dözümlülüklə yanaşın, yol hərəkətinin bəzi iştirakçılarının yol verdiyi
kobudluqlara cavab verməyin. Eyni zamanda, özünüz də heç vaxt kobudluq
etməyin.
Hətta
sizə elə gəlsə ki, sürücülərdən kimsə avtomobil sürməyi bacarmır və ya
hamıya mane olur, yenə də emosiyalarınızı cilovlayın. Yadda saxlayın
ki, onun yerində siz də ola bilərsiniz. Başqalarının səhvlərinə
dözümlülüklə yanaşın, özünüzü onların yerinə qoyun. Qarşıdakı
avtomobilin sürücü avtomobili uzun müddət işə sala bilmirsə, bərkdən
siqnal verib hay-küy salmayın.
Ola
bilsin ki, həmin sürücü avtomobili idarə etməyi təzəcə öyrənib və
yaranmış vəziyyətdə bərk həyəcan keçirir. Daim təmkinli olmağa çalışın,
çünki yolda xoşagəlməz vəziyyətlər kifayət qədər tez-tez baş verir və
əgər hər dəfə əsəbiləşsəniz, sinir sisteminiz buna tab gətirməz.
Emosiyalarınıza nəzarət etməyi öyrənin və yol hərəkətinin bütün
iştirakçılarına nəzakətlə yanaşın.
Əgər
əsəbiləşdiyinizi hiss etsəniz, melodik bir musiqi işə salıb bir qədər
sakitləşin. Psixoloqlar məsləhət görürlər ki, insan toplanmış mənfi
emosiyalardan azad olmaq üçün pəncərələri bağlayıb ucadan ürəyini
boşaltmalıdır. Bundan başqa, əgər imkan varsa, avtomobildən çıxın,
bədəninizlə bir qədər dartınma hərəkətləri edin, bu əhvalınızı
yaxşılaşdırar.
Avtomobil
sürməyi yeni başlayan sürücülərin bütün diqqəti yolda olmalıdır. Buna
görə ilk vaxtlar bütün kənar səslərdən imtina edin: sükan arxasında
musiqiyə qulaq asmayın, telefonla danışmayın. Əgər avtomobilinizdə
sərnişin varsa, xahiş edin ki, söhbətləri ilə diqqətinizi yoldan
yayındırmasın.
Yeni
sürücülər üçün ən qorxulu məsələlərdən biri parkinqdir. Bir qayda
olaraq, avtomobili düzgün parklamağı öyrənmək müəyyən vaxt tələb edir.
Hətta təcrübəli sürücülərin belə, parkinqlə bağlı çətinlikləri olur,
yeni sürücülərdən isə danışmağa dəyməz.
Əlbəttə,
avtomobil məktəbində sizə parkinqlə bağlı bütün əsas qaydaları və
üsulları öyrədiblər, amma parkinqin uğurla həyata keçirilməsi
avtomobilinizin qabaritlərini necə hiss etməyinizdən asılıdır. Yaxşı
olar ki, parkinq əməliyyatını öyrənmək üçün bir neçə payadan və ya
dirəkdən istifadə etməklə (onlar qabaqdakı və arxadakı avtomobillərin
rolunu oynayır) xüsusi meydançada məşq edəsiniz.
Qabaqdakı
və arxadakı avtomobillə sizin avtomobil arasında məsafə sizin
avtomobilin uzunluğunun iki mislinə bərabər olmalıdır. Bir daha
xatırladaq ki, avtomobilinizin qabaritlərini hiss etməyiniz olduqca
önəmlidir.
Avtomobilinizi
parklayarkən ətrafdakıları da unutmayın. Öncə əmin olun ki, sizin
avtomobil parklanmış digər avtomobillərə mane olmayacaq və yalnız
bundan sonra parkinq əməliyyatına başlayın.
Parkinqi
həyata keçirərkən avtomobilinizi digər avtomobilə həddən artıq yaxın
yerləşdirməyin. Yadda saxlayın ki, bir qədər sonra siz avtomobilinizi
həmin yerdən çıxarmalısınız və digər avtomobillə aranızdakı məsafə çox
kiçik olarsa, bunu edə bilməyəcəksiniz.
Yolda
hərəkət zamanı öncədən görülə bilməyən problemlərin baş verməməsi üçün
avtomobilinizin saz vəziyyətdə olub-olmadığını mütəmadi olaraq
yoxlamağa çalışın. Bunun üçün yola çıxmazdan əvvəl avtomobilinizin
ətrafına dolaşın və əmin olun ki, avtomobildə hər şey qaydasındadır.
Sonra
kapotun altına baxın və əyləc mayesinin, şüşə yuyucusunun və soyuducu
mayenin səviyyəsinə diqqət yetirin. Həm ön, həm də arxa tərəfdən
avtomobilin altına nəzər salıb soyuducu mayenin axıb-axmadığını
yoxlayın.
|